Comisiynwyd yr englynion hyn gan yr Eisteddfod Genedlaethol ar gyfer sesiwn 'Cerddi AmGen ein Prifeirdd' yn eisteddfod ddigidol 2020 / These englynion were comissioned by the National Eisteddfod for the digital eisteddfod of 2020.

Garddio

​Gweithred hardd ydy garddio. Yn araf
cei wared â'r rhuo
yn dy ben, er gwaethed y bo;
cei freuder, mwynder y mendio

a rhyw reidrwydd dirodres, yn haul braf
ar ddysgl bridd gynnes,
i godi rhaw, torchi llawes,
a phlannu hadau llysiau lles.

Roedd yn braf cael gwahoddiad i gyfrannu at Oedfa Radio Cymru ar 24 Mai, dan arweiniad aelodau Urdd Gobaith Cymru ar ddechrau wythnos Eisteddfod-T. Gallwch glywed cerdd gen i, 'Wedyn (IV)', yn ystod y rhaglen, sydd ar gael i wrando yn ôl am fis yma:

https://www.bbc.co.uk/programmes/m000jdwn

Diolch i griw Llanw Llŷn am y gwahoddiad i feirniadu'r gystadleuaeth flynyddol hon am eleni, a llongyfarchiadau i Llŷr Titus am ei hennill hi.

Mae gweddill rhifyn Mai y Llanw ar gael i'w darllen yma.

Mae ein noson lenyddol ddiweddar o'r Cymoedd bellach ar gael i bawb ei hailfyw ac ailfwynhau'r cyfoeth o straeon a cherddi a gafwyd gan y pedwar awdur.

Mae pamffled digidol o waith y noson ar gael o ​https://www.ystamp.cymru/llyfraudigidol

Diolch i Grug Muse am gynnwys 'Cywilydd III' ar ei rhestr o gerddi ar gyfer cyfnod ansicr. Gellir darllen yr eitem ar wefan Cymru Fyw yma:

https://www.bbc.co.uk/cymrufyw/52487631

Cynghanedd Workshop: Zoom, Sunday 28 June - 3-4pm

Guided poetry workshop by Iestyn Tyne from Y Stamp: 'An introduction to the Welsh poetic art of cynghanedd.' We will explore how its principles can be applied and adapted to writing in English.

Tickets: https://www.eventbrite.com/e/where-im-coming-from-digital-events-tickets-104200524574

Bu ein noson farddoniaeth ar-lein gyntaf yn llwyddiant digymysg - gallwch bellach wylio'r cyfan yn ôl ac ail-fyw rhywfaint o'r hwyl ar YouTube:

Dyma gerdd ddiweddaraf prosiect Bardd Preswyl Eisteddfod Llŷn ac Eifionydd 2021 - cerdd ar y cyd gan flynyddoedd 3, 4, 5 a 6 yn ysgolion Llanaelhaearn a Chwilog, yn dilyn trafod yr eisteddfod a'r hyn y mae 'hunaniaeth' yn ei olygu i wahanol bobl ...

Does 'na'm trên i Afonwen

Does ’na’m trên i Afonwen –
dewch ar y bws efo Miss Owen!
Dewch dan gysgod Tre’r Ceiri –
be welwch chi drwy’r ffenestri?
 
Ifan Garej yn trwsio car,
ogla pei o siop y bwtsiar;
yn ei glocsia’ ma’ PC Owen
yn dawnsio efo Catrin Alwen!
 
Cidwm, ci bach Rhys a Meinir,
adfeilion Celtaidd hyd y tir;
dacw’r sant a dacw’i ael
haearn yn sgleinio yn yr haul.
 
Mr Huw ar yr ukelele
a’r pentre’n llawn o hwyl a sbri;
pawb yn y Neuadd ar gyfer y steddfod
a’r gwartheg yn canu ar gaeau Rhoshafod.
 
Dawnsio mae’r dail ar hyd y Lôn Goed
a Gordon Huws ar y llwybr troed,
ac o dan y tonnau ger Chwarel Trefor
mae’r pysgod yn canu fel côr yn y môr.

----

Diolch am y gwahoddiad i fynd i Ysgol Chwilog i dreulio'r pnawn hefo disgyblion y ddwy ysgol. Dwi'n edrych ymlaen yn fawr iawn at sgwennu cerddi tebyg hefo disgyblion mewn ysgolion eraill dros y flwyddyn nesa, a gweu cerdd groeso enfawr o'r cyfan.

Englyn enwog R. Williams Parry i Neuadd Mynytho biau'r diolch am y teitl, ac wrth i bwyllgorau apêl ar draws Llŷn ac Eifionydd gychwyn ar eu gwaith, mi fydd gan ein neuaddau pentref ni rôl bwysig yn y gwaith o ddwyn pobl ynghyd. Mewn byd brawychus, nid bychan yw gwerth hynny.
​
Cyd-ddyheu
 
Os, yn fyd-eang, y teimlwn angau
a’i wrando astud yng ngraen ein distiau;
a’r diawl ar gerdded trwy’n cymunedau
yn hwylio’r te ac yn hawlio’r toeau,
rhoi nodwydd ar hen edau – trwsio’r gliw
wnawn ninnau heddiw yn ein neuaddau.